• O novo cuestionario pódese responder ata o 30 de novembro.

O novo cuestionario ten como obxectivo recompilar información sobre as oportunidades e os desafíos actuais nas zonas rurais, as aspiracións para estas zonas en 2040 e as accións necesarias para conseguilas.

O público obxectivo desta nova fase da consulta é:

- Cidadanía de zonas rurais, urbanas e intermedias

- Administracións locais, rexionais, nacionais e europeas

- Organizacións que representan aos interlocutores sociais, á sociedade civil e aos consumidores; ONG centradas principalmente nas zonas rurais

- Partes interesadas do sector privado (e as súas asociacións)

- Entidades académicas ou de investigación; institucións e organizacións educativas e de formación.

A consulta pública sobre a visión a longo prazo para as zonas rurais é un primeiro paso cara a unha declaración da Comisión Europea sobre o tema, que se publicará a mediados de 2021 .

Para participar no cuestionario, vai á seguinte ligazón: https://bit.ly/3kfQhTP

O cuestionario inclúe un conxunto opcional de preguntas sobre a Política Agrícola Común e o desenvolvemento territorial .

Consulta pública

A Comisión Europea comprometeuse a desenvolver unha visión a longo prazo para as zonas rurais . Para iso, é necesario avaliar como é a vida hoxe en día nas zonas rurais de Europa e identificar as claves da súa prosperidade. Esta consulta pública contribuirá a este proceso recompilando as percepcións e opinións da poboación europea sobre cuestións como:

1. As necesidades das zonas rurais na actualidade

2. Atractivos das zonas rurais.

3. Oportunidades de futuro nas zonas rurais.

4. Administración e gobernanza nas zonas rurais.

Contexto da consulta

Na Unión Europea (UE), 96 millóns de persoas viven en zonas rurais, que ocupan o 45 % do territorio .

As zonas rurais ofrecen unha ampla gama de oportunidades sociais e económicas aos residentes rurais e á sociedade no seu conxunto, cunha calidade de vida e oportunidades laborais únicas en moitas e diversas áreas empresariais. Teñen un papel especial que desempeñar na transición cara a unha Europa verde e sostible , mitigando o cambio climático, proporcionando alternativas aos combustibles fósiles e desenvolvendo a economía circular. Ademais, a crise da COVID-19 podería provocar cambios significativos na sociedade, dos que as zonas rurais poderían beneficiarse.

Tamén teñen o seu propio conxunto de desafíos específicos, especialmente relacionados co afastamento: acceso a servizos públicos e sanitarios, conectividade, educación e fuxida da mocidade.