24.04.2017

O Parlamento Europeo propuxo unha serie de medidas e recomendacións que abarcan diversas accións e nas que participan tanto os gobernos europeos como a Comisión Europea, co obxectivo de acabar coa desigualdade entre homes e mulleres nas zonas rurais e dar maior visibilidade ao traballo que levan a cabo moitas mulleres no campo.

O Parlamento Europeo pediu a inclusión dunha perspectiva de xénero na distribución das axudas da Política Agrícola Común (PAC) e que se manteñan e melloren os subprogramas temáticos sobre as mulleres nas zonas rurais nas futuras reformas.

Como ferramentas eficaces para detectar e reducir a brecha de xénero existente, o Parlamento Europeo propón o seguimento regular da situación das mulleres nas zonas rurais, a recollida de datos e a avaliación de indicadores para identificar os papeis das mulleres na agricultura. Esta información tamén se empregaría para desenvolver un Estatuto Europeo para as Mulleres Agricultoras nun futuro próximo.

En canto ás políticas de desenvolvemento rural dos países membros, solicítase que se estableza como prioridade a promoción do acceso das mulleres rurais ao mercado laboral . Tamén pide que o emprego feminino se inclúa como unha medida específica no FEADER ; e para que os Estados membros promovan a propiedade compartida das explotacións agrícolas familiares e implementen mecanismos que garantan a igualdade de condicións laborais e a participación das mulleres na toma de decisións a todos os niveis e en todos os ámbitos.

Proponse unha difusión máis activa por parte dos Estados membros doinstrumento europeo de microfinanciamento Progress como unha solución ao problema de financiamento ao que se enfrontan moitas mulleres. O Parlamento Europeo insta aos Estados membros a ofrecer varios tipos de incentivos para apoiar a sustentabilidade e o desenvolvemento das empresas emerxentes e as pemes.