03.01.2018

A plataforma Red.es , unha entidade pública empresarial do Ministerio de Enerxía, Turismo e Axenda Dixital (MINETAD) dependente da Secretaría de Estado para a Sociedade da Información e a Axenda Dixital (SESIAD), presentou o pasado decembro dous programas de axuda á dixitalización nunhas xornadas organizadas pola Rede Rural Nacional.

A convocatoria do programa de primeiras axudas "Oficinas de Transformación Dixital" foi publicada no Boletín Oficial do Estado (BOE) o 23 de decembro. Este programa ten como obxectivo crear e consolidar Oficinas de Transformación Dixital (ODT) para facilitar o proceso de dixitalización das empresas españolas e o emprendemento dixital . Está dirixido a asociacións ou organismos profesionais cuxas actividades estean centradas no sector ao que serven e que dispoñan dunha localización física na Comunidade Autónoma onde solicitan axuda, na que desenvolver as súas actividades.

As accións que deben levar a cabo estas OTD son de difusión (sensibilización e estimulación das pemes no seu proceso de transformación dixital e dos emprendedores) e de apoio (atención e resolución de consultas sobre solucións e metodoloxías TIC para mellorar a xestión empresarial).

O prazo de solicitude será dun mes a partir do día seguinte á publicación da convocatoria no Boletín Oficial do Estado (BOE).

Conta con 5 millóns de euros do Fondo Europeo de Desenvolvemento Rexional (FEDER) cofinanciados polo Programa Operativo de Crecemento Intelixente (POCint) . A subvención concedida será dun mínimo de 100.000 € e un máximo de 200.000 €. Poderá haber un máximo dunha oficina por sector económico e comunidade autónoma.

O programa de subvencións "Asesores dixitais " abrirá en breve unha invitación xeral para rexistrarse como asesores e publicará a convocatoria de solicitudes para pemes.