Este seminario foi organizado pola Comisión Europea, a Dirección Xeral de Agricultura e Desenvolvemento Rural (DG AGRI) e o European Innovation Partnership EIP-AGRI Service Point, dirixido aos Sistemas nacionais de Coñecemento e Innovación Agrícola (AKIS) como parte dos plans estratéxicos da PAC post-2020.

O fomento e o intercambio de coñecemento e innovación forman parte do obxectivo transversal da modernización da PAC post-2020. Do mesmo xeito, estas accións xogan un papel fundamental para axudar aos agricultores e comunidades rurais a afrontar os retos actuais e futuros, xerando unha demanda crecente de solucións innovadoras que renoven produtos, procesos e servizos. Para conseguir o maior impacto, estas solucións deben desenvolverse mediante a colaboración de persoal debidamente formado, así como de agricultores e forestais, como usuarios finais dos resultados obtidos, para que poidan ser aplicados de forma eficiente no medio rural. Este modelo de co-creación de solucións innovadoras estableceuse no período actual e aglutina investigación, innovación e intercambio de coñecemento no marco do programa Horizonte 2020 e da PAC con EIP-AGRI, cos seus máis de 1.200 Grupos Operativos (OG). Todos eles continuarán no próximo período 2021-2027.

No que respecta aos AKIS nacionais e rexionais, o reto é aumentar a interconexión entre eles para que se poidan xerar solucións innovadoras de forma eficaz. Actualmente hai unha cantidade importante de coñecemento dispoñible, pero está fragmentado en distintos países e non se aplica suficientemente.

Un AKIS que funcione ben acelerará a innovación en toda a UE, evitará a duplicación de traballos, permitirá aforrar custos e reforzará o impacto do financiamento da investigación e innovación (I+I) rexional, nacional e europea facilitando as transferencias transfronteirizas de coñecemento.

O obxectivo xeral do seminario é proporcionar apoio aos Estados membros na preparación dos seus Plans Estratéxicos AKIS, así como promover o intercambio eficiente de coñecementos agrícolas en toda a UE. Centrarase en compartir experiencias e mostrar exemplos inspiradores de organización e apoio á creación e intercambio de coñecementos agrícolas entre as distintas partes interesadas de AKIS. Ofrecerá a oportunidade de coñecer as Administracións dos Estados membros e outros actores do AKIS, a través dos diferentes debates e intercambios de experiencias sobre a elaboración de Plans Estratéxicos e a planificación das accións do AKIS.